ഇന്ത്യന്‍ സിനിമയിലെ നിത്യവസന്തമായിരുന്ന ശ്രീദേവി മരിച്ചിട്ട് മൂന്നു ദിവസം പിന്നിടുകയാണ്. പ്രിയ താരത്തിന്റെ മുഖം അവസാനമായി ഒന്നു കാണാന്‍ അന്ധേരിയിലുള്ള ശ്രീദേവിയുടെ വസതിക്ക് സമീപമുള്ള സെലിബ്രേഷന്‍ സ്‌പോര്‍ട് ക്ലബിലേക്ക് സിനിമയിലെയും രാഷ്ട്രീയത്തിലെയും പ്രമുഖര്‍ ഉള്‍പ്പെടെ ആയിരക്കണക്കിന് ആളുകളാണ് ഒഴുകിയെത്തിയത്.
ശ്രീദേവി യാത്രയാകുമ്പോഴും സൗന്ദര്യസംരക്ഷണത്തിനായി അവര്‍ നടത്തിയ ശസ്ത്രക്രിയകളും ചര്‍ച്ചാവിഷയമായി. എന്നാല്‍ ഇക്കാര്യത്തില്‍ പ്രതികരണവുമായി ശ്രീദേവിയുടെ പേഴ്‌സണല്‍ മേക്കപ്പ് മാനായിരുന്ന സുഭാഷ് ഷിന്‍ഡെ തന്നെ രംഗത്തെത്തിയിരിക്കുകയാണ്.’ അവര്‍ മരിച്ചുവെന്ന് എനിക്കിപ്പോഴും വിശ്വസിക്കാനാവുന്നില്ല. മോഹിത് മര്‍വയുടെ വിവാഹത്തിനു ദുബായില്‍ അവരോടൊപ്പം ഞാനും ഉണ്ടായിരുന്നു.
അവര്‍ എപ്പോഴത്തെയും പോലെ വളരെ സുന്ദരിയും സന്തോഷവതിയും ആയിരുന്നു. രണ്ട് ദിവസം മുമ്പ് ഞാന്‍ മടങ്ങിയെത്തിയിരുന്നു. ശനിയാഴ്ച രാത്രിയാണ് വാര്‍ത്തകള്‍ വന്നു തുടങ്ങിയത്. ഞാനിപ്പോഴും അതിന്റെ ആഘാതത്തിലാണ്.”സുഭാഷ് ഷിന്‍ഡെ പറയുന്നു.
”വളരെ പോസിറ്റീവായ ആളായിരുന്നു അവര്‍.2012ല്‍ പുറത്തിറങ്ങിയ ഇംഗ്ലീഷ് വിംഗ്ലീഷ് എന്ന ചിത്രത്തിനു ശേഷമാണ് ഞാന്‍ അവരോടൊപ്പം ജോലി ചെയ്തു തുടങ്ങിയത്. അവരുടെ കൂടെ ജോലി ചെയ്യുന്നവരെയെല്ലാം തന്റെ കുടുംബാംഗങ്ങളായായിരുന്നു അവര്‍ കണ്ടിരുന്നത്.
നിറങ്ങളെക്കുറിച്ച് ഷേഡുകളെക്കുറിച്ചും അവര്‍ക്ക് വ്യക്തമായ കാഴ്ചപ്പാടുണ്ടായിരുന്നു അവര്‍ക്ക് അവരുടെ സൗന്ദര്യത്തെക്കുറിച്ചും അത് എങ്ങനെ സംരക്ഷിക്കണമെന്നതിനെക്കുറിച്ചും നല്ല ബോധ്യമുണ്ടായിരുന്നു. അവരില്‍ നിന്നും ഞാന്‍ ഒരുപാട് കാര്യങ്ങള്‍ പഠിച്ചിട്ടുണ്ട്.” സുഭാഷ് പറയുന്നു.
